الحمد لله امتحانات شهادة الدبلومات الفنية تمت بسلام
دون شكوى من صعوبة الامتحان أو فوضى أو قلق
بالنجاح والتوفيق يا شباب اقصد(بالغش والبلطجة يا اسطى )
وشكرا للملاحظين ورؤوساء الأدوار لتأمينكم اللجان وعدم السماح لأحد بأن يقلق راحه الطلاب وهما بيستخدموا المحمول أو بيغشوا غش جماعي وكمان شكرا لتوصيل الاجابات لغاية اللجان مباشره او على الواتس مقابل ٢٠٠٠ جنية
بس زعلانه من المدرس اللي بعد ما جمع الفلوس أتأخر على تسليم الاجابات وكان السبب في فوضى في اللجان والعيال قالوا عايزين فلوسنا الأستاذ نصب علينا وشتموا رئيس اللجنة والملاحظين بس ربنا ستر والاجابه وصلت بسلام ولحقوا ينقلوا في الوقت المحدد ....
المهم نفسكم تكونوا ايه في المستقبل أو نشوفكم فين المرحله القادمه ؟؟
طالما خدت الشهادة وبقيت خريج دبلوم أد الدنيا محدش أدك ولا زيك ولا ناوي تدخل كلية وتكمل تعليمك في الجامعه
اتمنى ان يتم الاهتمام بالتعليم الفني وخاصه تعليم الثلاث سنوات التجاري والصناعي لأن ولا تعليم ولا امتحان ولا اهتمام ومجرد شهادة مكتوب عليها حاصل على دبلوم ...
طيب حصل عليها ازاي ملناش دعوه اهو في الاخر هيتعلم صنعه تنفعه
لا احنا مش عايزين كده احنا عايزين تعليم بحق واستغلال لطاقة المعلمين والطلاب والمباني بدلا من اهدارها بهذا الشكل المهين في الوقت اللي مش لاقيين اماكن للتعليم الأساسي
اتمنى زي ما بنهتم بالمدارس التطبيقية والتعليم المزدوج يكون في اهتمام بمدارس التعليم التجاري والصناعي الثلاث سنوات لأن الشباب دي عندهم طاقة ويجب استغلالها بشكل صحيح ومناسب لامكانياتهم ولا اعيب عليهم ولكن اعيب على منظومه متكامله في التعليم الفني لا رقابه عليها ولا متابعه والاهتمام كله انصب على المدارس التطبيقية والتعليم المزدوج أما الباقي عليهم العوض ..
محدش يسأل الصور دي مدرسه ايه ولا لجنة ايه ولا مديريه ايه
يكفي انها حقيقية وبتمثل ظاهرة على مستوى الجمهوريه ..
#
